پیکرِ جاں میں نور تیرا ہے
ہر نفس میں ظہور تیرا ہے
پتہ پتہ تری گواہی دے
ڈالی ڈالی پہ بور تیرا ہے
تو ہر اک جا بھی ہے مگر مسکن
ماورائے شعور تیرا ہے
گفتگو سے مہک نہ کیوں آئے
ذکر ‘بین السطور تیرا ہے
لطف‘ عصیاں سرشت بندوں پر
پھر بھی ربِ غفور! تیرا ہے
تجھ سے کچھ بھی نہیں ہے پوشیدہ
سب غیاب و حضور تیرا ہے
آنکھ یک دم کھلی ہے پچھلے پہر
یہ بُلاوا ضرور تیرا ہے
حرف و صوت و ثنائے سرور میں
سارا جذب و وفور تیرا ہے
